Jorge Escapa anovó una temporada más col Círculu Xixón Baloncestu y Conocencia.

Debutó nuna categoría tan competitiva como ye la LEB Plata y n’una temporada complicada pola incertidume debíu al Covid19. Un añu ónde la mayoría de los equipos tuvieron que tirar de nueves promeses de les sos canteres para completar les plantiyes.

Nesti casu, el Círculu Xixón Baloncestu dió la oportunidá al xixonés Jorge Escapa. ¿Qué tal lo fizo? Estes fueron les palabres del entrenador Nachu Galán cuando-y preguntar pol pivot xixonés.

“Escapa demostró la pasada temporada que ta capacitáu pa xugar en Leb Plata. Apurrió una gran solidez defensiva, onde foi capaz d’anular a dalgunos de los meyores pivots de la categoría. Foi capaz de tresmitir la so enerxía al restu del equipu y xugar con una intensidá bien alta, impropia d’un debutante na categoría.

Tien un gran instintu reboteador faciéndose, gracies a ello, una amenaza nel rebote ofensivu y un seguru so la nuesa canasta.

Jorge ye un xugador bien sacrificáu, capaz de lleer perbién el xuegu ofensivu, faciendo que los sos compañeros pudieren xugar más cómodos y lliberaos. Un aspeutu bien valoráu polos entrenadores y que dacuando pasa desapercibíu pal públicu.

Representa amás, la esencia de lo que buscamos pal CIRCULU XIXON: un mozu de Xixón, totalmente identificáu col Club, formáu na cantera del Grupu Cuadonga y que puede sirvir d’exemplu para los mozos asturianos que quieran xugar nes categoríes LEB nos próximos años.

Amás Galán propón para esta temporada un nuevu retu para Jorge Escapa “Va Ser propuestu como Capitán del equipu esta temporada al axuntar toles característiques que nos gusten na nuesa plantiya: Asturianu, Enerxía, intensidá, sacrificiu ya identidá col Club y la ciudá.”

¿Va ser Jorge Escapa’l nuevu Capitán del Círculu Xixón Baloncestu? Ya lo veremos.