El conxuntu xixonés collechó unos de los meyores partíos de la temporada frente a la so talismán afición. Alo Marín, Justinas Olechnavicius y Tury Seara fueron imparables pal conxuntu vascu.
La sorpresa de la xornada foi l’apaición del nuevu fichaxe del Círculu Xixón, Quarry Greenaway, acabante llegar de Nueva York nun duldó en ponese a disposición del entrenador.
Los xixoneses arrincaron esti partíu perbién, poniéndose per delantre nel marcador y liderando los primeros minutos. A pesar d’ello, enfrente taba l’actual campeón de la Copa Leb Plata que nun diba poner les coses tan fáciles. Nel min 4:06 consiguieron empatar el partíu y acabar a tan solo un puntu por detrás. (18-17)
El segundu cuartu, apaecieron Justinas y Tury p’abrir un buecu bien importante y obligaron al técnicu vascu a pidir tiempu muertu pa intentar paralos. Pero nun lu consiguieron, esta vegada foi Alo Marín quien fixo un últimu aceleríu pa dexar al Juaristi ISB a 16 puntos per debaxo. (47-31)
El pasu por vestuarios al Círculu namás-yos dio más enerxíes pa siguir col so escelente partíu. Un tercer cuartu casi perfectu pa los xixoneses p’arrincar un postrer cuartu con más tranquilidá de lo que nos suelen tener avezaos. (62-44). Esti últimu periodu’l conxuntu xixonés siguía esfrutando y remataron una victoria ablucante. (81-64)
El Círculu Xixón cierra la selmana de maratón con dos victories y una derrota. Gran balance pal equipu xixonés que, ponlos en bon camín p’algamar l’allampada permanencia.
El próximu domingu’l Círculu Xixón tóca-y volver al Palaciu pa disputar un partíu que taba aplazáu. Nesta ocasión visítanos l’Enrique Soler de Melilla, un equipu que tamién engarra por salvase nel so primer añu na Leb Plata.
