El Círculu Xixón pon fin nuna rueda de prensa a una temporada histórica na faceta deportiva y desastroso na económica.
Carlos Rodellar, presidente del Círculu Xixón Baloncestu facía balance de la temporada nel apartáu administrativu y económicu del Club “La temporada foi histórica no deportivo pero desastrosa no económico, aunque nun dexamos nin un pufu a naide”
Aprofiaba la importancia de siguir buscando un patrocinador principal “que pueda danos un soporte y una base económica para tener una meyor estabilidá nel presupuestu “ y daba les gracies pol sofitu del Ayuntamientu de Xixón y del Principáu a pesar de que nun ye abondo pa un equipu que quier aspirar a más. Tamién quixo estimar el sofitu que tuvo’l club per parte de tolos patrocinadores y de la “paciencia” que tuvieron los aficionaos nuna temporada marcada poles llimitaciones sanitaries.
El futuru del club pasa por “siguir trabayando na busca de nuevos patrocinadores, que nos ayude a tener meyor estabilidá presupuestaria y vamos siguir engarrando coles instituciones por que nos ayuden “.
Nel apartáu deportivu Nacho Galán amosábase bien satisfechu col gran añu que se collechó a pesar de toes circunstancies vivíes como fueron les mancadures, llimitaciones d’aforu, partíos cancelaos…. A pesar d’ello la clave del ésitu pal técnicu xixonés foi “que fiximos un baloncestu bien de bloque, bien d’equipu que nos dexó ganar seis de los últimos siete partíos y que’l parón nel Play Off cortáronnos esi ritmu de xuegu qu’habíamos consiguío”
Toles sos palabres de Nacho Galán sofitólo con númberos, nos que destacó que’l conxuntu xixonés foi’l meyor en tiros de trés, los cuartos en valoración y por detrás de los trés equipos que xubieron a la LEB Oro y qu’amás se ganó a dos de los finalistes d’esti play off d’ascensu como fueron el Zornozta y Alega Cantabria ; y qu’amás se consiguió una victoria cómoda nel Palaciu contra’l campeón de la LEB Plata y el primera xubíu a la LEB Oru Juaristi.
Un gran añu que se va intentar repitir na siguiente temporada anque por razones económiques, Nacho indicó que “vamos formar una plantiya con xugadores que creemos que tienen calidá pero que nun realizaron una bona temporada y la so cotización tea a la baxa”.
Cara a la temporada que vien el Club quier caltener a cinco o seis xugadores “si ye posible” yá que tanto Carlos Rodellar como Nacho Galán lo ven complicao debío a “l’alta cotización de munchos de los nuesos xugadores que xubió por cuenta de la gran temporada que fixeron y que’l Círculu nun va poder competir contra les ufiertes d’otros clubes”. Lo que sí yá ta en marcha son les posibles renovaciones de los trés asturianos: Ángel Moro, Jorge Escapa y Jaime Llano. La incertidume va ser la continuidá de Robert Swift como xugador yá que como dixo Nacho Galán “tendría que faer un cambéu absolutu na so vida por que vuelva formar parte de la plantiya“, anque nun se refuga que l’americanu siga nel Club pero con otres funciones.
