El Círculo Gijón Baloncesto pieslla esti 2020 con una victoria maxistral énte un Zornotza irreconocible.
Esperábase un partíu duru para’l conxuntu xixonés por cuenta de les numberoses baxes. Pero una vegada más los xugadores tornaron a sacar toles sos ganes pa dar una impresionante exhibición de baloncestu a la so afición. “Nun puedo destacar a nengunu porque foi una victoria coral” declaraba l’entrenador Nacho Galán al términu del alcuentru.
El partíu entamó col Zonortza per delantre y amosando un xuegu rápidu y primiendo enforma al conxuntu llocal. Nun foi hasta’l minutu 1:56, cuando’l Círculo llogró empatar l’alcuentru. El primer cuartu remató con un 15-13.
Un triple de Jaime Llano y un 3+1 de Tury arrancaba’l Círculo’l segundu cuartu, dexando al Zornotza cada vegada más lloñe nel marcador. 34 puntos consiguió’l conxuntu xixonés nesti cuartu, ventaya abondo pa dir pa vestuarios con tranquilidá. (49-30)
Si l’empiezu del segundu cuartu foi increíble, esti tercer cuartu nun quedaba atrás; un triple de Jaime Llano y otru d’Alo Marín volvía a dexar al Zornotza fríos. Esti tercer cuartu remató con un +23 a favor del Círculo.
El conxuntu xixonés supo caltener les distancies nel marcador hasta llegar a la fin d’alcuentru con un 85-65 nel lluminosu.
Gran victoria del Círculo que pon puntu y final a esti 2020 tan duru pa toos y toes con una gran sonrrisa.
Toos y toes los que formamos parte d’esti equipu queremos desea-yos a toos y toes los xixoneses una feliz salida y entrada d’añu!!
