De primeres, agradecer al Conceyu de Xixón, al PDM y al conceyal Ramon Tuero pol so sofitu de cara a esta nueva temporada de la Lliga LEB Plata 2021-2022. A los medios de comunicación pol so constante sofitu y siguimientu del nuesu equipu y pola so presencia nel día de güei nesti actu. A la Xunta Directiva del Club pol so gran trabayu día ente día pa poder tar güei equí y al cuerpu técnicu pol so gran llabor na confección del equipu de la próxima temporada. Y a tolos abonaos del Circulo que la temporada pasada sufrieron un autentico calvariu pa poder esfrutar del baloncestu d’alta competición.
El pasáu 02 de xunetu materializó la nuesa inscripción na cuarta temporada consecutiva na Lliga LEB Plata y güei presentamos esta nueva temporada que va ser, si quepe, más intensa, más disputada y más competida que la pasada temporada. Volvemos tar encuadraos nel Grupu Oeste con rivales bien fuertes como Ourense, acabante baxar pero que caltien la so estructura de LEB Oru, con llargos desplazamientos a Andalucía y Melilla y con equipos que se tán faciendo col oxetivu directu de xubir a LEB Oru.
El nuesu principal oxetivu anguaño, siendo más ambiciosos, va ser metenos nel playoffs d’ascensu d’esta temporada. Póngo-yos esti oxetivu bien ambiciosu al cuerpu técnicu y a los xugadores, porque una vegada que vivimos el primera playoffs casi ensin públicu poles restricciones anguaño, Xixón y los sos aficionaos merécense la emoción d’un playoffs pol ascensu.
Siguimos calteniendo la nuesa vinculación y collaboración col Club Baloncestu Pumarín, una de les mayores canteres del baloncestu xixonés y asturianu y anguaño si’l COVID 19 dexa, vamos fomentar el baloncestu dende la base con campus, clinics y actividaes nes Escueles deportives. Y tamos trabayando pa la creación d’una BECA CIRCULO XIXÓN BALONCESTU Y CONOCENCIA que va dexar deportistes con proyección tanto deportiva como académica. Esti compromisu de vinculación llegó al alcuerdu ente dambos clubes de qu’esta próxima temporada los equipos del C.B.Pumarín van denominase C.B. PUMARIN CIRCULU XIXÓN
El nuesu Club lleva nel so apellíu la palabra CONOCENCIA y dende el primer día de la so creación el nuesu compromisu foi amás de col deporte, tamién cola sociedá, la cultura, la educación y por eso anguaño marcamos otru oxetivu social, venceyáu a los 17 OXETIVOS DE DESENVOLVIMIENTU SOSTENIBLE plantegaos pola ONU, necesarios para construyir un mundu meyor dende una perspectiva social, medioambiental y económica desenvolviendo una estratexa de SOSTENIBILIDÁ y concretamente vamos trabayar colos cinco oxetivos que la mesma ONU venceya col deporte.
Los ODS sobro los que vamos trabayar son:
El nº 3 – Garantizar una vida saludable y promover el bienestar pa toos y toes en toles edaes.
El nº 4 – Garantizar una educación calidable inclusiva y equitativa y promover les oportunidaes d’aprendizaxe permanente pa toos.
El nº 5 – Algamar la igualdá ente los xéneros y empoderar a toles muyeres y neñes.
El nº 11 – Consiguir que les ciudaes y los asentamientos humanos sían inclusivos, seguros, resilientes y sostenibles.
Y el nº 16 – Promover sociedaes xustes, pacífiques ya inclusives.
A lo llargo de la temporada vamos entamar y vamos realizar dellos eventos rellacionaos con estos ODS, que más palantre vos diremos anunciando y desenvolviendo.
Yá empecemos a trabayar y el nuesu primer pasu foi xuntanos al Manifiestu por un sector deportivu inclusivu y seguro col colectivu LGTBI qu’hai promovíu el Gobiernu del Principáu d’Asturies al traviés de la Dirección Rexonal de Deportes y que nos lleva a trabayar directamente colos ODS mentaos qu’abogen pola inclusión social.
Pero por que too esto pueda llevase a cabu, tanto los oxetivos deportivos como los oxetivos de desenvolvimientu sostenible, precisamos el sofitu de Xixón, del Principáu d’Asturies de los aficionaos al bon baloncestu y en definitiva DEPENDE DE TI y depende de vós.
DEPENDE DE TI va ser el nuesu eslogan y la nuesa imaxe mientres tola temporada porque p’algamar cualquier oxetivu, cualquier retu, dependemos de les persones, de les sos ganes de ver baloncestu, de les sos ganes de crear una sociedá más xusta, de les sos ganes de diversión, de les sos ganes de vivir la vida, en definitiva depende de nós – DEPENDE DE TI.
Plantégate cualquier oxetivu, cualquier retu a la fin pa sacalo adelantre siempres DEPENDE DE TI.
Pa cumplir los nuesos oxetivos precisamos al públicu que nos arrope, sofítenos y anímenos y por llo siguimos siendo unu de los clubes de LEB Plata coles tarifes d’abonaos más barates de la categoría que vos resumo de siguío:
Renovación d’abonu de la temporada pasada: siguimos calteniéndolo en 50 euros
Nuevu abonáu senior (mayor de 18 años): 70 euros.
Recuperamos los abonos de siella a cuerpu de pista que l’añu pasáu poles restricciones y protocolos COVID nun pudimos tener al preciu de 100 euros
Creemos l’abonu nuevu pa mozos y moces de 13 a 17 años con un preciu de 10 euros. Tolo que non vale daqué nun se valora y hai qu’educar a los nuesos fíos y fíes en que sepan dar valor a les coses.
A lo último, l’abonu infantil de neños y neñes hasta 12 años que va siguir siendo gratuitu.
Va ser necesariu dase d’alta al traviés de la web o nel nuesu puntu d’abonaos, del carné d’abonáu, que a lo llargo de la temporada va llevar una serie de ventayes qu’ensin él non podrán esfrutase. La más clara ye que los precios de taquilla anguaño van ser de 15 euros pa la entrada d’adultu y 5 euros pa la entrada nueva de 13 a 17 años.
Estos precios van empuestos a fomentar que los aficionaos se den d’alta como abonaos dende’l principiu yá que pol abonu anguaño van poder esfrutar de 4-5 partíos de pretemporada más 13 partíos de la temporada regular, más los playoffs, acutándonos la posibilidá de declarar dalgún día de sofitu al club en partíos importantes.
Los abonos pueden formalizase al traviés de la páxina web del Club onde apaecen les distintes opciones o en nuesupuntu físicu de venta allugáu nes instalaciones del nuesu collaborador CUATRO GOTES PRODUCCIONES ubicaos na cai Emilio Tuya, 51 baxu.
Tolos abonos formalizaos antes del 30 de setiembre van tener el so carné antes del primer partíu de lliga’l 17 d’ochobre.
Recuérdovos igualmente que yá tenemos a la vuestra disposición la llotería de Navidá del Club que puede mercase nos establecimientos de los nuesos collaboradores CUATRO GOTES PRODUCCIONES, El LLAGAR DE BEGOÑA (en Begoña) y EL BODEGON DE COYANZA na Plaza del Gas.
Nun ye nengún secretu qu’una base del nuesu presupuestu ye l’apartáu d’abonaos y pa tener meyor equipu, meyor estructura y poder diseñar a más curtiu plazu’l nuesu oxetivu de devolver a Xixón a la élite del baloncestu, a la ACB, a la fin precisamos tol sofitu de l’afición polo qu’el nuesu futuru depende de vós – DEPENDE DE TI
Gracies pola vuestra atención.
Presidente del Círculu Xixón: Carlos Rodellar
