L’equipu xixonés ufiertó una bona puesta n’escena contra’l CSU SIBIU. Namás un fallu nos triples de 3 puntos nos postreros segundos del partíu quitó al Círculu de dar la sorpresa nel Palaciu de los Deportes de Xixón.
Bon estrenu del Tornéu Baloncestu Internacional Villa de Xixón ónde’l Círculu Xixón demostró ser bien competitivu énte un gran equipu rumanu.
L’equipu dirixíu por Nachu Galán y Guillermo Arenas arrincó con un bon primer tiempu colándose a los vestuarios a +5 de diferencia. (34-39)
Tres el descansu’l partíu siguía bien igualáu pero esta vegada’l SIBIU pegó un bon aceleríu para adelantrase nel marcador y zarrar esti cuartu a +6 puntos. (60-54)
Llegó’l postrer cuartu y l’equipu rumanu siguía alloñándose del Círculu. Nun foi hasta’l minutu 6:15 cuando’l conxuntu xixonés empezó a reaccionar con un +2 d’Andrea Donda , un 2+1 y un triple de Unai Mendikote. Pistoletazu de salida pa intentar la remontada. A falta de 43.3 segundos el Círculu consiguió poner les tables nel marcador. Lamentablemente un fallu de los trés tiros llibres fixo que’l conxuntu xixonés nun tuviera’l premiu. El partíu acabó 80-77 a favor del SIBIU.
Un SIBIU que foi de menos a más y que supo sufrir y aguantó nos últimos intres del alcuentru.
La Próxima xornada del Tornéu Internacional Villa de Xixón va celebrase güei 17 de setiembre a partir de les 20:00h nel Palaciu de los Deportes de Xixón y van enfrentase el Unicaja Banco Uviéu VS CSU SIBIU .
