Les actividaes rellacionaes coles nueves tecnoloxíes son protagonistes del nuesu club. Círculo Baloncesto y Conocimiento va intentar ser un altavoz de toles iniciatives empobinaes a la dixitalización de les empreses, por aciu la so organización, patrociniu o divulgación de les mesmes.
El club, concebíu como una organización empresarial, va revertir tolos sos ingresos nel afitamientu del proyectu deportivu y nel espardimientu del Conocimientu ente los y les sos siguidores.
Pa ello, tán roblándose alcuerdos cola Milla del Conocimientu, Cámara de Comerciu de Xixón, Asociación d’Empresarios Mozos (AJE), FADE, Innovastur, Conceyu de Xixón, al traviés del programa Impulsa o d’empreses mestes como Divertia.
Averar la empresa al deporte y viceversa ye un oxetivu ambiciosu pero absolutamente imprescindible nel Sieglu XXI. Les empreses tien la obligación de favorecer la práctica deportiva de los sos emplegaos y veceros. El deporte tien unos valores que nun pueden ser fechos de menos polos empresarios: esfuerciu, disciplina, meyora de la salú, usu del tiempu llibre y el so aspectu lúdicu nun pueden ser escaecíos polos sectores económicos de la nuesa sociedá.
Per otru llau, les empreses nun pueden resalvar el grandísimu espardimientu que’l deporte tien güei na nuesa sociedá, l’aportación qu’ésti fai a los nuesos fíos na so formación y la necesidá de referentes deportivos que-yos animen ya impulsen a la so práctica. Averar poro, les sos actividaes y llogros empresariales, amás del impactu publicitariu qu’esto supón, ye una forma de crear venceyos duraderos y enraigonaos ente los y les siguidores y practicantes del deporte, nesti casu del Baloncestu. Los empresarios pueden salir del escurantismu que los arrodia fuera de la área empresarial y averase a la sociedá al traviés del deporte y les actividaes paraleles, consiguiendo d’esta miente una valoración positiva per parte de toos. Valoración que yá tienen los deportistes y de la que tendríamos de deprender.
¿Por qué baloncestu? Tolos deportes contienen valores y la so práctica ye de normal, sana y aconseyable, pero’l Baloncestu implica unos aspectos que lu convierten al nuesu xuiciu nel preferíu: xuegu d’equipu, onde toos ataquen y defenden y onde tamién l’aportación individual d’un deportista ye valorada y bien importante. La reglamentación sobre los cambeos permite la participación de tolos miembros a lo llargo d’un alcuentru, lo que favorez el trabayu n’equipu. El tamañu de la cancha y de los pabellones onde se desenvuelven los alcuentros avera’l deporte al espectador y permíte-y esfrutar del mesmu cuasi como si tuviera dientro de la cancha. La táctica, la estratexa son aspectos clave nel desenvolvimientu de los alcuentros, añadiendo entá más emoción a los partíos. Y nun podemos escaecer l’espectáculu d’’un deporte que siguen millones de persones en tol mundu y qu’espierta l’interés del aficionáu y aificionada polo xeneral.
Les interrupciones del xuegu (4 periodos), tiempos muertos, cambeos, prepartíu, faciliten la inclusión d’espectáculos, demostraciones, proyección de vídeos, xuegos, que presten, entretienen y averen entá más los mensaxes al espectador y l’usu de les redes sociales convierte en virales munchos de los sos conteníos.
Otros sectores tamién van ser oxetivu del Círculo Gijón Baloncesto y Conocimiento: Medicina deportiva, Alimentación saludable, Preparación Física p’adultos…
Tán programándose, conferencies, charres, cursos, qu’averen estes disciplines a los y les siguidores del Club.
Finalmente dientro del Conocimientu incluyimos tamién aspectos formativos nel ámbitu deportivu. La nuesa collaboración cola FBPA o la Fundación Gijón Baloncesto y otres organizaciones va suponer la nuesa participación en Clinics, Campus deportivos, Cursos pa Monitores, Árbitros y tolo rellacionao col ameyoramientu de los nuesos mozos deportistes
